چەكسەم تۇتۇن شورىدىم ، شورىمىدىم مەن قاننى ،
پۈلىۋەتتىم ئىس بىلەن ، يۈرەكتىكى فىغاننى .
ناخشا ئېيتىش ھارامدۇ ر، ھارام ئەمەس تاماكا ،
ھەرەمدىمۇ كۆردىممەن ، كەيىپ -ساپا قىلغاننى .
خۇمار بۇلۇپ قالغان مەن ئامالىم يوق تاشلاشقا ،
ئۇنى چىقىرىپ ھارامغا ،قىينىمىغىن بۇجاننى .
مەكروھ دەيدۇ بەزىلەر ، ھاراملىققا دەلىل يوق .
ھالال دەيمەن چۈنكى مەن ، چۈشەنمەيمەن ئىماننى .
ئوغۇرلارمۇ «كەسپى» نى ، جاپالىق دەپ ھالال دەر ،
ھالال دەيدۇ جالاپمۇ ، ئىپپىتىنى ساتقاننى .
ھارام ئەمەس تاماكا سوراپ بېقىڭ بەڭگىدىن ،
مەدىيلەيمىز «ھالال»دەپ پەتىۋانى تاپقاننى .
كۆپ سۆزلىمە ئەي لاتا ، قۇلۇڭدا بار تاماكا .
زىناخور دە ئىمامنى ، بارلىق سىنى توسقاننى .
ھالال نىمە ؟ ھارامچۇ ؟ مىنىڭ ئانچە كارىم يوق ،
ھالال ساناپ قىلىمەن دائىم كۆڭلۈم تارتقاننى ،
ئۆلپەت بولسا كىم ماڭا شۇ تەقۋادار – داموللام ،
مۇناپىق دەپ تىللايمەن ، مىنى چەكلەپ باسقاننى .
ھارام بولسا نىمە قورق ؟ كىسەل بولسام دوختۇر بار ،
كۆرمىگەنمۇ كىسەلگە ، ئاسما ئۇكۇل ئاسقاننى ،
قورقۇتماڭلار موللاملار ، ئۇدۇنيادىن – ئازاپتىن ،
ئۇ دۇنياغا بارغىچە يىگەچ تۇراي تاپقاننى .
