گۈلساي
غېنى سەمەت
بۇ يەرنىڭ ئىسمى گۈلساي
بۇ يەردە جەسەتلەر گۈلدەك پۇرەكلەيدۇ
مېنىڭ ئۇ يەردە ئۆيۈم بار
قورقماي كېلىۋېرىڭ
بىزگە ئاللا، ئەرۋاھلار يار…
مۇھەممەت باغراشنى يېقىندا كۆمۈپ قويدۇق
ئابدۇقادىر داموللامنىڭ ئوغلىنى يوقلىغاچ ئۆتكۈر ئەپەندىم بىلەن مۇڭدىشىپ كېتىڭ
ئايلىنىپ ئايلىنىپ
مازاردا بىر ياشاپ بېقىڭ
مېنىڭ بىر ئاغىنەم بار
ئۇ مېھمانلىرىنى كەچتە گۈلساي بىلەن مېھمان قىلىدۇ
بىر سوم بولسا كۇپايە
بۇ يەرگە 310-يول ئاپتۇبۇسى كېلىدۇ
بۇ يەردە پوجاڭلار ئېتىلىدۇ
ھەربىيلەر مەشق قىلىدۇ
بۇۋاقنىڭ ھەمرىيى كۆمۈلىدۇ
ئۆلىۋالماقچى بولغانلار ئۆلۈمگە تويىدۇ
ئۈرۈمچىدە بولسىڭىزلا
يا يوقلاپ يا ئۆلۈپ كېلەرسىز
كەلمىسىڭىزمۇ مەيلى
گۈلساي شېھىتلىكى يۇچۇن بىر تارىخقا شاھىت بولۇپ
تا قىيامەتكىچە تۇرىۋېرىدۇ
2014-يىلى 22-مارت، ئۈرۈمچى گۈلساي
