پەرھات تۇرسۇن
پەرھات تۇرسۇن
قىز ئېلىپ قېچىش
مىكروب پەيدا قىلار سۆيگۈ تېنىمدە،
سەن مۇھتاجسەن بىر قېتىملىق نىشانسىز سەپەرگە.
ئەڭ مۇكەممەل سەپەردۇر نىشانسىز سەپەر،
سەن ھالقىپ كەتمەكچى بارچە كۈتۈشتىن،
سەن بۇزۇپ تاشلىماقچى بارچە ئىزاھنى،
سەن قېچىپ قۇتۇلماقچى بارچە ئۈمۈتتىن.
ئارقا كۆرۈنۈشسىز ئەسلىمەڭدە قالغىنى پەقەت،
نېرۋىسى يىگىلەپ كەتكەن بىر كۆزنىڭ نۇرى.
ۋە كاككۇكنىڭ دەرتلىك ئاۋازى قوزغاتقان،
كۆپىيىش چۈشىنىڭ تېنىڭدىكى زەھىرى.
يول بويى سەن چۇقۇم قالىسەن ئۇچراپ،
بۇلۇتلارنىڭ شەكىللرى بەرگەن ۋەھىگە.
تاغلارنىڭ ئاۋازى بەرگەن بىشارەتلەرگە،
يول بويى سەن چۇقۇم قالىسەن ئۇچراپ،
كېچىنى كېسىپ ئۆتكەن شۇ قۇملىقتىكى،
شامالنىڭ ئىلاھىي سالاپىتىگە.
تاماشا قىلىسەن ئوت قويغۇچىنىڭ،
گۈلخان ياققاندىكى تەلۋىلەرچە زوراۋانلىقىنى،
ۋە قىپ-يالىڭاچ ئوتنىڭ ھاياسىز پومىداقلىشىنى.
قورقىسەن سۇنىڭكى چوڭقۇرلىقىدىن،
قۇتراتقۇلۇق قىلىدۇ تېنىڭدە قاراڭغۇلۇق،
بىلمەيسىز كەپ قالدۇق زادى قەيەرگە؟
بىراق سەن دېدىڭكى: يەتتۇق مەنزىلگە،
مەن دېدىم: قېچىشنىڭ مەقسىتى ھەرگىز،
قۇتۇلۇش ئەمەس بەلكى تېخىمۇ ئامالسىز قېلىش.
