يۈرىكىڭنى بېرىپ تۇر
مەلىكە مۇھەممەت ھىلال
كۆزلىرىڭنى بېرىپ تۇر ماڭا،
كۆرىۋالاي ئۆزۈمنى قېنىپ.
تاشلاپ قويۇپ يالغۇزلۇقۇمغا،
قېچىپ چىقاي مەڭزىڭدىن سىرغىپ.
سۆزلىرىڭنى بېرىپ تۇر ماڭا،
ئىزھار قىلاي كۆڭلۈڭنى بىردەم.
مەن كۈتكەندەك سۆزلىسەڭ غۇۋا،
قاچار شۇ چاغ تەشۋىشلىرىم ھەم.
يۈرىكىڭنى بېرىپ تۇر ماڭا،
كىم ئىچىدە بىر يېرىپ باقاي،
چىقسام شۇئان تۆكۈلۈپ ساڭا،
تائەبەدكە باغرىڭدا ئاقاي.
